Meneja wa Habari na Mawasiliano wa Simba SC, Ahmed Ali, amesema klabu hiyo ipo tayari kuandika historia nyingine kwa kutwaa Kombe la CRDB, akisisitiza kuwa iwapo wataibuka mabingwa, kutakuwa na sherehe kubwa na paredi litakaloendana na hadhi ya klabu hiyo.
Akizungumza wakati kikosi hicho kikielekea Pemba kwa ajili ya kujiandaa na mchezo wa fainali dhidi ya Azam FC utakaopigwa Uwanja wa Gombani, Ahmed alisema taji la CRDB lina thamani kubwa kwa Simba na mashabiki wake, hivyo ushindi utastahili kusherehekewa kwa kiwango cha juu.
"Niweke wazi tu, kama tunachukua kombe hili tutasherehekea. Tutafanya sherehe kulingana na hadhi na ukubwa wa klabu yetu pamoja na ukubwa wa kombe lenyewe."
Ahmed aliongeza kuwa sherehe hizo hazitakuwa za kawaida, bali zitakuwa na mpangilio maalumu unaoendana na hadhi ya Simba.
"Litakuwa ni paredi lenye hadhi ya nyota tano na siyo mchaka mchaka."
Simba yajiamini kabla ya Fainali
Licha ya kukiri kuwa Azam FC ni mpinzani mwenye ubora na anayetakiwa kuheshimiwa, Ahmed amesema Simba inaingia kwenye mchezo huo ikiwa na imani kubwa ya kuibuka na ushindi.
Amesisitiza kuwa kikosi hicho kina ubora wa kutosha na kinafahamu uzito wa mchezo huo kwa mashabiki wa klabu hiyo.
"Ni fainali, mpinzani wetu tunajua ubora na ugumu wake, lakini ni wazi sisi ni bora na wakubwa zaidi yake. Tuna uhitaji mkubwa wa kombe hili, watu waliotutuma ni wengi kuliko waliowatuma wao."
Ahmed amesema nguvu kubwa ya Simba kuelekea mchezo huo inatokana na mashabiki wake, ambao wameendelea kuipa timu morali na hamasa ya kupambana hadi dakika ya mwisho.
"Sisi tuna sauti nyingi nyuma yetu ambazo zinatusukuma tuwapelekee kombe hili. Mashabiki wetu wanatupa mzuka, morali na ari ya kupambana kuelekea mchezo huu wa fainali."
Amehitimisha kwa kusisitiza kuwa dhamira ya Simba ni moja tu, kuibuka mabingwa wa CRDB Cup na kuwarejeshea furaha mashabiki wao baada ya msimu wenye changamoto.
"Tuko hapa tukiwa na dhamira moja tu, kuchukua Kombe la CRDB na kuwapelekea mashabiki wetu."
Fainali hiyo kati ya Simba na Azam FC inatarajiwa kuvuta hisia za mashabiki wengi wa soka nchini, huku Simba ikisaka ubingwa wake wa nne wa CRDB Cup na kuendeleza rekodi yake ya kutopoteza fainali yoyote tangu mashindano hayo yaliporejea mwaka 2015.
