Macho ya dunia yataelekezwa kwenye pambano kubwa la hatua ya 16 bora ya Kombe la Dunia 2026, ambapo Brazil watamenyana na Norway usiku wa leo kuanzia saa 5:00 usiku (23:00 EAT). Timu zote zinaingia uwanjani zikiwa na lengo moja tu – kushinda na kutinga robo fainali.
Brazil, mabingwa mara tano wa dunia, wanaendelea na ndoto ya kutwaa taji lao la sita. Baada ya kuiondoa Japan kwa ushindi wa mabao 2-1 katika hatua iliyopita, Seleção wanaingia kwenye mchezo huu wakiwa na morali kubwa na wakiamini uzoefu wao unaweza kuwavusha tena.
Kwa upande wa Norway, kikosi hicho kinaendelea kuwa miongoni mwa timu zilizovutia zaidi katika mashindano haya. Wakiongozwa na mshambuliaji hatari Erling Haaland, waliinyoa Côte d’Ivoire mabao 2-1 na sasa wanaamini wana uwezo wa kuandika historia kwa kuwaondoa vigogo wa soka duniani.
Pambano hili pia linatarajiwa kuwa vita ya nyota, huku Haaland akitarajiwa kuiongoza safu ya ushambuliaji ya Norway, wakati Brazil wakimtegemea ubora wa kikosi chao chenye uzoefu na wachezaji wenye uwezo wa kubadili matokeo kwa muda mfupi.
Mshindi wa mchezo huu atafuzu hatua ya robo fainali na kuendelea kusaka ndoto ya ubingwa wa dunia, huku timu itakayopoteza ikimaliza rasmi safari yake katika Kombe la Dunia 2026.
