Tottenham Hotspur wamekamilisha rasmi usajili wa kiungo mshambuliaji wa kimataifa wa Italia, Sandro Tonali, kutoka Newcastle United katika dili kubwa linaloripotiwa kufikia takribani pauni milioni 100.
Usajili huo unakuwa miongoni mwa mikataba mikubwa zaidi katika historia ya klabu hiyo, huku ukithibitisha azma ya Spurs kuimarisha kikosi chao kuelekea msimu mpya wa Ligi Kuu England.
Dili kubwa la kihistoria
Spurs wamelipa ada ya awali ya takribani £92.5 milioni, huku nyongeza (add-ons) zikifikisha jumla ya dau hilo hadi £100 milioni.
Tonali, mwenye umri wa miaka 26, amejiunga na Spurs baada ya kipindi cha mafanikio na changamoto akiwa Newcastle United, ambapo aliisaidia klabu hiyo kutwaa Kombe la Carabao na kushiriki michuano ya Ligi ya Mabingwa Ulaya.
Kauli ya Tonali baada ya kutambulishwa
Akizungumza baada ya kukamilisha uhamisho wake, Tonali amesema alihisi Tottenham ndio klabu sahihi kwake tangu mazungumzo ya awali, akieleza kufurahishwa na maono ya benchi la ufundi na mazingira ya klabu hiyo.
Amesema mazungumzo yake na kocha yalikuwa ya kina na ya kushawishi, hali iliyomfanya kuchagua kujiunga na Spurs licha ya uwepo wa klabu nyingine zilizoonyesha nia.
Spurs waendelea kujenga kikosi kipya
Usajili wa Tonali unakuwa sehemu ya mchakato mpana wa Tottenham kuimarisha kikosi chao, baada ya kufanya usajili kadhaa muhimu katika dirisha hili la uhamisho.
Klabu hiyo inalenga kurejea katika ushindani wa juu wa Ligi Kuu England na pia kufanya vizuri katika michuano ya Ulaya, baada ya msimu uliopita kutokuwa na matokeo mazuri.
.jpg)
