Beki wa kati raia wa Colombia, Yeison Fuentes (23), ameomba kuondoka Azam FC katika dirisha hili la usajili akitaka kutafuta changamoto mpya nje ya Tanzania, licha ya kuwa bado ana mkataba wa kuitumikia klabu hiyo hadi mwaka 2027.
Taarifa zinaeleza kuwa Fuentes amewasilisha ombi lake kwa heshima mbele ya uongozi wa Azam FC, akiushukuru kwa ushirikiano alioupata tangu alipojiunga na klabu hiyo. Aidha, amewaomba viongozi wawe tayari kusikiliza ofa zitakazowasilishwa kutoka kwa klabu zinazohitaji huduma yake.
Chanzo cha karibu na mchezaji huyo kinaeleza kuwa Fuentes anaamini umefika wakati wa kupiga hatua nyingine katika maisha yake ya soka, huku akivutiwa na fursa za kucheza katika ligi nyingine nje ya Tanzania.
Kwa sasa, Azam FC bado haijatoa msimamo rasmi kuhusu ombi hilo, huku ikitathmini mustakabali wa beki huyo ambaye bado amebakiza mwaka mmoja wa mkataba wake. Uamuzi wa mwisho unatarajiwa kufanyika baada ya klabu kupokea na kujadili ofa zitakazowasilishwa kwa ajili ya nyota huyo wa Colombia.
