Kocha wa Ureno, José Mourinho, ameanza rasmi majukumu yake kama kocha mkuu mpya wa Real Madrid baada ya kuongoza mazoezi yake ya kwanza klabuni hapo Julai 13, 2026. Mourinho amerejea Santiago Bernabéu baada ya miaka 13 tangu alipoondoka, akichukua nafasi ya Álvaro Arbeloa ambaye alikuwa akiiongoza timu hiyo kabla ya uteuzi huo.
Real Madrid ilimtangaza Mourinho kuwa kocha mpya Juni 11, 2026, baada ya uamuzi wa Bodi ya Wakurugenzi chini ya Rais Florentino Pérez. Kocha huyo amesaini mkataba wa miaka mitatu utakaomalizika Juni 30, 2029, huku klabu hiyo ikikamilisha usajili wake kwa kulipa kifungu cha ukombozi kwa klabu yake ya awali, Benfica ya Ureno.
Katika siku yake ya kwanza ya mazoezi, Mourinho alionekana akisimamia kwa karibu maandalizi ya kikosi chake, huku wachezaji wakianza na vipimo vya afya kabla ya kuingia kwenye mazoezi ya kimwili na kiufundi. Baadhi ya nyota wa timu hiyo walionekana kushiriki mazoezini huku wakipokea maelekezo ya kocha huyo mwenye uzoefu mkubwa.
Kurejea kwa Mourinho kunakuja wakati Real Madrid ikitafuta mabadiliko makubwa baada ya kushindwa kutwaa mataji makubwa katika misimu miwili iliyopita. Uongozi wa klabu hiyo unaamini uzoefu na falsafa ya Mourinho vinaweza kuirudisha timu kwenye ushindani wa juu, huku mashabiki wakisubiri kuona sura mpya ya Los Blancos chini ya "The Special One".
