Nyota wa kimataifa wa Ufaransa, Michael Olise, ameripotiwa kuwa na nia ya kujiunga na Real Madrid katika dirisha hili la usajili, akiamini kuwa miamba hiyo ya Hispania ndiyo sehemu sahihi ya kupiga hatua nyingine kubwa katika maisha yake ya soka.
Kwa mujibu wa ripoti, Olise anaona kuchezea Real Madrid kama fursa ya kutimiza ndoto zake na kujiunga na moja ya klabu kubwa zaidi duniani. Uongozi wa Los Blancos pia unafahamu dhamira ya mchezaji huyo, huku ukitajwa kuwa tayari kuandaa ofa kubwa ambayo inaweza kuweka rekodi mpya ya usajili kwa nyota huyo wa Kifaransa.
Hata hivyo, Bayern Munich imeendelea kusisitiza kuwa Olise hauzwi, ikionyesha msimamo thabiti wa kutotaka kuachana na mmoja wa wachezaji wake muhimu kuelekea msimu mpya.
Licha ya msimamo huo, taarifa zinaeleza kuwa mabingwa hao wa Bundesliga tayari wameanza kutathmini mbadala wanaoweza kuwasajili iwapo hali itabadilika. Mazungumzo kati ya Bayern na Olise yanatarajiwa kufanyika mara baada ya kumalizika kwa Kombe la Dunia 2026 ili kujadili mustakabali wake.
Iwapo dili hilo litakamilika, Olise ataungana na kikosi cha nyota wa Real Madrid katika kile kinachoweza kuwa moja ya usajili mkubwa zaidi wa dirisha hili la majira ya joto, huku mashabiki wakisubiri kuona kama ndoto yake ya kuvaa jezi nyeupe ya Santiago Bernabéu itatimia.
