Klabu ya Azam FC imekamilisha usajili wa kiungo mshambuliaji Enock Molia kutoka FC Saint-Éloi Lupopo ya Jamhuri ya Kidemokrasia ya Congo, ikiwa ni sehemu ya mipango ya kuimarisha kikosi kuelekea msimu mpya wa mashindano.
Molia ambaye anatajwa kuwa miongoni mwa wachezaji waliokuwa na kiwango bora katika Ligi Kuu ya DR Congo, amefanikiwa kuvutia viongozi wa Azam FC kutokana na uwezo wake wa kucheza eneo la pembeni la ushambuliaji, kasi pamoja na uwezo wa kutengeneza nafasi na kufunga mabao.
Taarifa zinaeleza kuwa nyota huyo wa Congo amesaini mkataba wa miaka miwili kuitumikia Azam FC, huku akitarajiwa kuleta nguvu mpya katika safu ya ushambuliaji ya timu hiyo inayolenga kufanya vizuri katika mashindano ya msimu ujao.
Usajili wa Molia unaendana na mkakati wa Azam FC wa kuongeza ubora wa kikosi chake kwa kusajili wachezaji wenye uwezo wa kuleta tofauti ndani ya uwanja. Awali, kocha Florent Ibenge alitajwa kuvutiwa na huduma ya mchezaji huyo kutokana na sifa zake za kushambulia na uwezo wake wa kuendana na mfumo wa timu.
Katika msimu uliopita akiwa FC Lupopo, Molia alionyesha kiwango kizuri na kuwa mmoja wa wachezaji muhimu wa klabu hiyo, huku akihusika kwenye kutengeneza na kufunga mabao.
