Ndoto ya winga mahiri wa TRA United, Ramadhan Chobwedo, kujiunga na Simba SC katika dirisha hili la usajili imegonga mwamba baada ya changamoto ya majeraha iliyompata kuelekea mwisho wa msimu uliopita.
Taarifa zinaeleza kuwa Chobwedo alikuwa amefikia makubaliano ya awali ya kutua Msimbazi mara baada ya msimu kumalizika. Hata hivyo, mipango hiyo imesimama kufuatia jeraha alilopata ambalo linatarajiwa kumuweka nje ya uwanja kwa kipindi kirefu.
Inaelezwa kuwa winga huyo alipata majeraha katika mechi za mwisho za msimu, huku ripoti zikionyesha atalazimika kukaa nje ya uwanja kwa zaidi ya wiki 12 ili kuendelea na matibabu na programu ya kurejea katika kiwango chake.
Ni pigo kubwa kwa Chobwedo ambaye alikuwa katika kiwango bora msimu uliopita na kuvutia vilabu kadhaa, huku Simba ikionekana kuwa ndiyo iliyokuwa mbele katika mbio za kupata saini yake. Majeraha hayo yamekatisha kwa muda ndoto yake ya kuvaa jezi ya Wekundu wa Msimbazi.
Kwa sasa, nyota huyo anaendelea na matibabu chini ya uangalizi wa wataalamu, huku ikielezwa kuwa endapo ataendelea vizuri na programu ya kupona, anaweza kurejea uwanjani mwanzoni mwa mwaka 2027.
Simba, kwa upande wake, inalazimika kuendelea kutafuta mbadala katika eneo la ushambuliaji katika kuimarisha kikosi chake kwa ajili ya msimu mpya wa mashindano.
