Baadhi ya mashabiki wa Argentina wanaendelea kuibua maswali kuhusu mazingira yaliyozunguka fainali ya Kombe la Dunia 2026 dhidi ya Hispania, wakidai kuwa kulikuwa na viashiria vilivyoonyesha timu hiyo haikuwa katika hali ya kawaida hata kabla ya mchezo kuanza.
Miongoni mwa madai yanayoenezwa ni kwamba kocha Lionel Scaloni aliwasili uwanjani akiwa analia, huku ikidaiwa kuwa Lionel Messi alikosa mara kadhaa kufunga katika mazoezi ya kupasha misuli, jambo ambalo baadhi ya mashabiki wameliona kuwa halikuwa la kawaida. Pia wamehoji kutokuwepo kwa familia ya Messi uwanjani, licha ya kuripotiwa kuwa walikuwa nchini Marekani.
Mashabiki hao pia wanadai baadhi ya wachezaji walitoka vyumbani kuelekea uwanjani wakiwa na huzuni, huku wakieleza kuwa Enzo Fernández na Lisandro Martínez walionekana wakilia. Aidha, wamedai Messi aliwasihi wenzake kwa kusema, “Tusahau kila kitu, twendeni tukacheze,” kauli ambayo kwao imeongeza maswali kuhusu hali ya kikosi kabla ya mchezo.
Katika upande wa kiufundi, baadhi yao wamehoji maamuzi ya Scaloni, wakidai alibadili mfumo uliokuwa umeisaidia Argentina kufika fainali. Pia wameeleza kushangazwa na kutotumika kwa Lautaro Martínez, licha ya Argentina kushindwa kupata hata shuti moja lililolenga lango ndani ya dakika 90 za kawaida.
Hoja nyingine zilizotolewa zinahusu uamuzi wa Cristian Romero na Lisandro Martínez kuomba kutolewa wakidai kuwa na majeraha, pamoja na malalamiko kuhusu baadhi ya maamuzi ya waamuzi dhidi ya Hispania. Wapo pia waliotafsiri namna baadhi ya wachezaji walivyokuwa kwenye sherehe za mwisho kama ishara ya hali ya kisaikolojia isiyo ya kawaida.
Hata hivyo, hakuna ushahidi wa kuthibitisha madai hayo, na hakuna tamko rasmi kutoka FIFA, Shirikisho la Soka la Argentina (AFA), benchi la ufundi au wachezaji linaloonyesha kuwa kulikuwa na tukio la siri au shinikizo lililoathiri maandalizi ya timu kabla ya fainali.
Kwa sasa, hoja hizo zinabaki kuwa nadharia na maoni ya baadhi ya mashabiki kwenye mitandao ya kijamii. Matokeo ya fainali yanaendelea kutambuliwa rasmi kama ushindi wa Hispania, na hakuna mamlaka ya soka iliyodokeza kuwepo kwa mazingira yasiyo ya kawaida yaliyoathiri mchezo huo.
