Rais wa Klabu ya Young Africans (Yanga SC), Injinia Hersi Said, usiku wa Ijumaa Julai 24, 2026, amewalipua mashabiki wa klabu hiyo kwa kutambulisha rasmi wachezaji watatu wapya wa kimataifa, huku akiahidi kuwa huu ni mwanzo tu wa mapinduzi makubwa ya kikosi hicho kuelekea msimu wa 2026/2027.
Utambulisho huo uliorushwa mubashara kupitia Runinga ya Azam TV na mitandao ya kijamii ya klabu, unahusisha wachezaji watatu kati ya watano wa kigeni ambao Yanga imewasajili kwa siri kubwa kuimarisha safu yake ya ushambuliaji na kiungo.
Mashine Mpya ya Mabao yashushwa
Katika utambulisho huo uliokuwa ukisubiriwa kwa hamu, Yanga imemshusha mshambuliaji hatari raia wa Senegal mwenye asili ya Ufaransa, Cheick Ibrahima Touré, akitokea nchini Saudi Arabia.
Touré amesaini mkataba wa miaka miwili na ametajwa na Injinia Hersi kama "Mashine ya Mabao" (Goal Machine) itakayokuja kutatua changamoto za ufungaji klabuni hapo.
Mbali na Touré, Yanga imekamilisha usajili wa winga machachari wa kushoto kutoka nchini Zambia, Albert Kangwanda, ambaye anasifika kwa kasi na chenga za kuudhi, akiwa ametwaa tuzo ya Mchezaji Bora (MVP) nchini mwao msimu uliomalizika.
Mchezaji wa tatu aliyetambulishwa kukamilisha idadi hiyo ni nyota wa kimataifa, winga Housseine Zakouani kutoka Comoros., anayekuja kuongeza nguvu na uzoefu kwenye kikosi hicho.
Kauli ya Rais Hersi Said
Akizungumza wakati wa utambulisho huo, Injinia Hersi Said amewatoa hofu mashabiki wa Yanga na kusisitiza kuwa usajili huu umefanyika kwa umakini mkubwa kulingana na mapendekezo ya benchi la ufundi.
"Tunaingia kwenye msimu mpya tukiwa na malengo makubwa zaidi, si tu kutetea mataji yetu ya ndani, bali kufika mbali zaidi kimataifa. Wachezaji hawa watatu ni sehemu ya mpango mkakati wa kuifanya Yanga kuwa tishio Afrika," alisema Injinia Hersi.
Hersi amesema bado wachezaji wawili ambao watatambulishwa siku chache zijazo akiamini usajili wa nyota hao utakwenda kuongeza ubora wa kikosi na kuhakikisha wanafikia malengo ya kutwaa mataji yote ya ndani msimu ujao na kufanya vyema kwenye michuano ya ligi ya mabingwa barani Afrika (CAFCL)
