Kila dirisha la usajili linapofunguliwa, vita ya usajili kati ya Simba SC na Yanga SC huwa sehemu ya burudani kwa mashabiki wa soka nchini. Safari hii, Mnyama ameibuka na pigo kubwa baada ya kumnasa kiungo mshambuliaji mwenye uwezo mkubwa, Keletso Makgalwa, na kumtambulisha rasmi akiwa mchezaji mpya wa klabu hiyo.
Simba imefanikiwa kumsajili Makgalwa akitokea Sekhukhune United ya Afrika Kusini, katika usajili unaoelezwa kuwa miongoni mwa sajili kubwa iliyofanywa na klabu hiyo katika dirisha hili. Ujio wa mchezaji huyo umeongeza matumaini kwa mashabiki wa Msimbazi wanaotamani kuona kikosi chao kikifanya makubwa msimu ujao.
Makgalwa, ambaye ana uwezo wa kucheza kama winga wa kushoto pamoja na kiungo mshambuliaji namba 10, amefika Simba akiwa na rekodi nzuri katika Ligi Kuu ya Afrika Kusini maarufu kama Betway Premiership. Akiwa na Sekhukhune United kwa misimu miwili, ameonyesha ubora wake kwa kufunga mabao manne na kutoa pasi 11 za mwisho zilizozaa mabao.
Katika msimu wa 2025/2026 pekee, Keletso alionyesha kiwango cha kuvutia zaidi baada ya kutoa asisti saba, akithibitisha kuwa ni mchezaji mwenye uwezo wa kutengeneza nafasi na kuamua matokeo ya mchezo.
Usajili huu umeongeza moto katika ushindani wa soka la Tanzania, hasa kutokana na taarifa kwamba Yanga walikuwa miongoni mwa klabu zilizokuwa zikifuatilia huduma yake na zilianza mazungumzo naye kabla ya Simba kuingilia kati na kukamilisha dili hilo.
Kuletwa kwa Makgalwa pia kuna mkono wa kocha Steve Barker, ambaye anamfahamu vizuri baada ya kufanya naye kazi nchini Afrika Kusini. Kocha huyo anaamini uwezo wa kiufundi wa mchezaji huyo unaweza kuongeza ubunifu na makali katika safu ya ushambuliaji ya Simba.
Kabla ya kujiunga na Sekhukhune United, Makgalwa alikuwa sehemu ya familia ya klabu kubwa ya Mamelodi Sundowns, ambapo alipata uzoefu wa kucheza katika mashindano ya ndani na ya kimataifa ya CAF. Pia aliwahi kucheza kwa mkopo katika klabu za Maritzburg United, Moroka Swallows na TS Galaxy.
