Hali ya sintofahamu imeendelea kumzunguka mshambuliaji wa Argentina, Julian Alvarez, ndani ya Atletico Madrid, huku mchezaji huyo akikosa mazoezi ya timu kwa siku tatu mfululizo wakati sakata la uhamisho wake likizidi kupamba moto.
Atlético Madrid imesema Álvarez hajafanya mazoezi kutokana na “indisposicion” yaani kutokuwa katika hali nzuri pamoja na malalamiko ya kiafya. Hata hivyo, kutokuwepo kwake kunatokea wakati ambao presha kutoka kwa mashabiki na mvutano kuhusu mustakabali wake klabuni umefikia kiwango kikubwa.
Siku tatu bila mazoezi
Alvarez alikosa mazoezi Jumatano na Alhamisi, kabla ya kutokuwepo tena Ijumaa. Kocha Diego Simeone amethibitisha kwamba mshambuliaji huyo hatashiriki katika mchezo dhidi ya Sevilla, baada ya kukaa siku tatu bila kufanya mazoezi na wenzake.
Simeone, hata hivyo, hakutumia tukio hilo kumshambulia mchezaji wake. Badala yake, alisema klabu itaendelea kumsaidia Alvarez na kuhakikisha anajisikia kuwa sehemu muhimu ya kikosi atakaporejea.
Presha kubwa baada ya kuzomewa na mashabiki
Kutokuwepo kwa Alvarez kunakuja siku chache baada ya kukumbwa na mazingira magumu katika mchezo wa Atletico dhidi ya Villarreal.
Mshambuliaji huyo alizomewa na baadhi ya mashabiki wa Atletico wakati wa mchezo huo kutokana na kauli zake kuhusu uwezekano wa kuondoka klabuni. Baada ya mchezo, alielekea moja kwa moja vyumbani kwa ushauri wa klabu.
Tukio hilo limeongeza hisia kwamba uhusiano kati ya Alvarez, mashabiki na baadhi ya sehemu za klabu umeingia katika kipindi kigumu.
Barcelona ndiyo chanzo kikubwa cha mvutano
Kiini cha sakata hilo ni hamu ya Alvarez kujiunga na Barcelona. Ripoti zimeeleza kwamba mchezaji huyo anaiona Barcelona kama ndoto yake, lakini Atletico imekuwa ikikataa uwezekano wa kumuachia.
Alvarez bado ana mkataba na Atlético hadi mwaka 2030, ukiwa na kipengele cha kuvunja mkataba kinachofikia takribani €500 milioni. Hali hiyo imefanya uhamisho wa moja kwa moja kwenda Barcelona kuwa mgumu sana.
Juzi, bodi ya Atletico ilitoa msimamo mkali zaidi, ikisema hakuna uwezekano wa kumuuzia Alvarez Barcelona. Klabu hiyo ilidai Barcelona haikushughulikia suala hilo kwa namna ya kitaalamu na kimaadili.
Arsenal nayo imeingia kwenye picha
Wakati Barcelona ikiendelea kuwa chaguo analolitamani Alvarez, Arsenal imeripotiwa kuwa inafuatilia hali yake.
Ripoti za hivi karibuni zinaeleza kuwa Atletico imekuwa kwenye mazungumzo ya siri na Arsenal kuhusu uwezekano wa uhamisho, huku kukiwa na madai kwamba klabu ya Madrid inaweza kusikiliza ofa kubwa zaidi ya £120 milioni.
Hii inaongeza presha kwa Alvarez, ambaye anataka mustakabali wake utatuliwe kabla ya dirisha la usajili kufungwa.
