Simba SC itakosa huduma ya mshambuliaji Libasse Guèye katika mchezo wa kwanza wa mzunguko wa awali wa Ligi ya Mabingwa Afrika dhidi ya Mighty Wanderers ya Malawi, utakaochezwa katika Uwanja wa Bingu National Stadium jijini Lilongwe.
Guèye hatakuwa sehemu ya kikosi cha Simba kutokana na kutumikia adhabu ya kadi nyekundu aliyoipata msimu uliopita katika mchezo wa hatua ya makundi dhidi ya Petro Atlético ya Angola. Kutokuwepo kwake kunaongeza changamoto kwa Simba katika maandalizi ya mchezo huo wa kimataifa.
Kwa upande wa Mighty Wanderers, Simba inakutana na klabu yenye historia kubwa katika soka la Malawi. Klabu hiyo iliyoanzishwa mwaka 1962 jijini Blantyre, ni miongoni mwa timu kongwe nchini humo na imeshinda ubingwa wa Super League ya Malawi mara saba.
Wanderers pia inaingia katika mchezo huo ikiwa na mabadiliko kwenye benchi la ufundi baada ya kumsimamisha kazi kocha wake mkuu, Bob Mpinganjira, siku chache kabla ya mchezo huo. Hatua hiyo imeifanya klabu hiyo kumteua kocha wa muda kuiongoza timu katika kibarua hicho dhidi ya Simba.
