Kocha Mkuu wa Simba SC, Steve Barker, ameweka wazi dhamira yake ya kuendeleza ubabe dhidi ya Mighty Wanderers ya Malawi, akisisitiza kuwa ushindi wa bao 1-0 walioupata katika mchezo wa kwanza haujawafanya kubweteka kuelekea mchezo wa marudiano wa hatua ya awali ya Ligi ya Mabingwa Afrika (CAFCL).
Simba ilipata ushindi muhimu ugenini nchini Malawi, lakini Barker anaamini bado kazi haijamalizika. Kocha huyo sasa anataka vijana wake waongeze kiwango na kuhakikisha wanapata matokeo mengine mbele ya mashabiki wao ili kutinga raundi inayofuata.
Mchezo huo wa marudiano utapigwa kesho Jumapili, Septemba 13, kwenye Uwanja wa Uhuru jijini Dar es Salaam, huku Simba ikiwa na faida ya bao moja kutoka katika mchezo wa kwanza.
Akizungumza kwenye mkutano na wanahabari kuelekea mchezo huo, Barker amesema ushindi wa ugenini ni jambo muhimu katika mashindano ya Afrika, lakini hilo haliwezi kuwa sababu ya timu yake kushusha kiwango.
“Tunahitaji kuonyesha kiwango zaidi mbele ya mashabiki wetu. Malengo ni kushinda na kwenda hatua inayofuata, ambayo itatupa nafasi ya kupigania hatua ya makundi msimu huu,” amesema Barker.
Barker amesema Simba inalenga kufanya vizuri zaidi katika mchezo wa marudiano na kuweka mazingira mazuri ya kuendelea na safari yake ya CAFCL, huku hatua ya makundi ikiwa miongoni mwa malengo makubwa ya msimu huu.
Libasse Gueye Arejea, Barker Apata Nguvu
Katika hatua nyingine, Barker amefichua kuwa kurejea kwa mshambuliaji Libasse Gueye kumeongeza nguvu na morali ndani ya kikosi cha Simba.
Gueye alikosekana katika mchezo wa kwanza dhidi ya Mighty Wanderers, lakini kurejea kwake kunampa Barker chaguo zaidi katika kupanga kikosi kitakachopambana na mabingwa hao wa Malawi.
Kocha huyo anaamini uwepo wa Gueye unaweza kuwa nyongeza muhimu kutokana na nafasi yake katika mipango ya kiufundi ya timu.
Macho ya mashabiki wa Simba yanaelekezwa Uwanja wa Uhuru, ambako Simba itatafuta ushindi mwingine ili kuthibitisha ubabe wake dhidi ya Mighty Wanderers na kukata tiketi ya kwenda raundi inayofuata ya Ligi ya Mabingwa Afrika.
