Msemaji wa Yanga SC, Ali Kamwe, amemuomba Mbwana Samatta kufikiria upya uamuzi wake wa kustaafu soka la kimataifa na kurejea kuichezea Taifa Stars katika fainali za AFCON 2027, akisema anastahili kupewa nafasi ya kuaga akiwa uwanjani mbele ya mashabiki.
Kamwe amesema mchango wa Samatta kwa soka la Tanzania unastahili kutambuliwa kwa heshima kubwa, akisisitiza kuwa mchezaji huyo hafai kuishia kuagwa kupitia mitandao ya kijamii.
“Kwa aliyoyafanya kwenye nchi hii, siyo mchezaji wa kuagwa Instagram,” amesema Kamwe.
Samatta alitangaza kustaafu kuichezea Taifa Stars Julai 7, 2026, baada ya kuitumikia timu hiyo kwa takribani miaka 15, akisema ulikuwa wakati wa kutoa nafasi kwa kizazi kipya kuendeleza timu ya taifa. Alikuwa nahodha wa Taifa Stars kwa takribani miaka 10 na aliiongoza Tanzania kufuzu AFCON mara tatu.
Hata hivyo, hadi sasa hakuna taarifa mpya kutoka kwa Samatta inayothibitisha kuwa amebadili uamuzi wake kufuatia wito huo. Awali, TFF pia ilisema ingekutana na Samatta na kusikiliza sababu za uamuzi wake, huku wadau wengine wakimtaka aendelee kuitumikia Taifa Stars hadi AFCON 2027.
