Shirikisho la Mpira wa Miguu Tanzania (TFF) limeamua kusimamia moja kwa moja mchakato wa uchaguzi wa klabu ya Simba SC baada ya kubaini mapungufu katika ratiba na utaratibu wa uchaguzi uliotangazwa awali na klabu hiyo.
Hatua hiyo inalenga kuhakikisha uchaguzi huo unafanyika kwa kuzingatia Katiba ya Simba SC, kanuni za uchaguzi pamoja na taratibu zinazotakiwa kisheria.
Mwenyekiti wa Kamati ya Uchaguzi ya TFF, Wakili Kiomoni Kiburu Kibamba, amesema uamuzi huo umefikiwa baada ya kamati kupokea malalamiko kuhusu utaratibu uliotumiwa na Bodi ya Wakurugenzi ya Simba Sports Club Company katika kuandaa mchakato huo.
Kibamba amesema kamati ilipokea barua mbili kupitia Ofisi ya Katibu Mkuu wa TFF. Barua ya kwanza ilihusu taarifa ya kuanza kwa mchakato wa uchaguzi wa Simba SC, huku ya pili ikiwa na malalamiko kuhusu utaratibu uliotumiwa na bodi hiyo.
Kutokana na malalamiko hayo, Kamati ya Uchaguzi ya TFF iliwaita na kuwasikiliza wahusika wa pande zote mbili kabla ya kutoa maelekezo kuhusu hatua zinazopaswa kufuatwa katika kuendeleza mchakato huo.
Katika mazungumzo hayo, kamati ilikutana na wawakilishi wa pande mbili zinazohusika, akiwamo Crescentius Magori aliyewakilisha upande wa mwekezaji na Murtaza Mangungu aliyewakilisha upande wa wanachama.
Kibamba amefafanua kuwa baada ya kupitia utaratibu uliotangazwa awali, kamati imebaini mapungufu katika ratiba ya uchaguzi, hivyo imeamua kuiboresha kabla ya kutangaza ratiba mpya itakayoongoza mchakato kuelekea uchaguzi huo.
Hatua hiyo ya TFF inatarajiwa kuweka utaratibu wa uchaguzi katika mfumo unaozingatia kanuni na taratibu husika, huku wadau wa Simba SC wakisubiri ratiba iliyoboreshwa na maelekezo zaidi kuhusu hatua zinazofuata.
