Kamati ya Uendeshaji na Usimamizi wa Ligi ya Bodi ya Ligi Kuu Tanzania (TPLB), katika kikao chake kilichofanyika Novemba 5, 2026, imepitia mwenendo na matukio mbalimbali ya Ligi Kuu ya NBC na kutoa adhabu kwa klabu kadhaa kutokana na makosa yaliyobainika.
Klabu ya Young Africans (Yanga) imetozwa faini ya Sh. milioni 5 baada ya mashabiki wake kurusha chupa za maji kuelekea kwa kocha wa viungo wa TRA United katika mchezo uliomalizika kwa sare ya 0-0. Aidha, klabu hiyo imehusishwa na tukio jingine la faini kwa kosa la mashabiki wake, kwa mujibu wa maelezo ya kamati.
Kwa upande wa Namungo FC, klabu hiyo imetozwa faini ya Sh. milioni 10 baada ya vijana wake waokota mipira kuchelewesha kwa makusudi kurudisha mipira uwanjani na kuificha, licha ya kuonywa mara kadhaa na mwamuzi. Kamati imeeleza kuwa kosa hilo limejirudia ndani ya msimu wa 2026/2027, baada ya kutokea pia katika mchezo dhidi ya Geita Gold.
Simba SC imetozwa faini ya Sh. milioni 5 baada ya vijana wake waokota mipira kuonekana wakimwaga maji nyuma ya lango la Namungo FC katika mchezo uliomalizika kwa ushindi wa Simba wa mabao 3-2. Kamati imetafsiri kitendo hicho kuwa kinachoashiria imani za kishirikina.
Nayo Azam FC imepigwa faini ya Sh. milioni 5 baada ya mtu aliyevaa jezi ya klabu hiyo kuingia uwanjani kabla ya mazoezi ya kupasha misuli na kumwaga vimiminika karibu na benchi la ufundi, kisha kufanya ishara ya kuita wachezaji wa Azam FC waingie uwanjani.
Aidha, Mashujaa FC imetozwa faini ya Sh. 500,000 baada ya wachezaji wake sita kuonyeshwa kadi za njano katika mchezo dhidi ya Yanga uliomalizika kwa ushindi wa mabao 2-1 kwa wenyeji.
Kwa mujibu wa TPLB, adhabu hizo zimetolewa kwa kuzingatia kanuni mbalimbali za Ligi Kuu ya NBC zinazohusu udhibiti wa klabu na taratibu za mchezo.
