Mataifa tisa tayari yamejihakikishia nafasi ya kushiriki fainali za Kombe la Mataifa ya Afrika (AFCON) 2027 zitakazopewa jina la PAMOJA, baada ya kukamilika kwa mechi za raundi ya nne ya kufuzu zilizochezwa Novemba 16 na 17, 2026.
Mataifa hayo ni wenyeji wenza Tanzania, Kenya na Uganda, pamoja na Morocco, Burkina Faso, Benin, Mali, Cameroon na Senegal ambazo zimepata tiketi kupitia matokeo ya mechi za kufuzu. Morocco, bingwa mtetezi, imekuwa miongoni mwa timu zilizofuzu baada ya kuifunga Niger bao 1-0 na kufikisha pointi 12 katika Kundi A.
Kwa mujibu wa CAF, timu hizo sita zimeungana na wenyeji watatu na kufanya idadi ya washiriki waliothibitisha kufuzu kufikia tisa kati ya 24 watakaoshiriki fainali hizo. Hii ina maana kuwa nafasi nyingine 15 bado zitasubiriwa katika mechi mbili za mwisho za kufuzu zitakazochezwa Machi 2027.
Fainali za AFCON 2027 zinatarajiwa kufanyika kuanzia Juni 19 hadi Julai 17, 2027, katika nchi za Tanzania, Kenya na Uganda. Michuano hiyo itakuwa ya kihistoria kwa Afrika Mashariki, kwani kwa mara ya kwanza nchi tatu zitakuwa mwenyeji wa pamoja wa fainali za AFCON.