Kikosi cha Yanga kimejipanga kusaka pointi tatu ugenini kitakaposhuka dimbani kesho Ijumaa, Novemba 20, 2026, kuikabili Polisi Tanzania katika mchezo wa Ligi Kuu ya NBC utakaopigwa kwenye Uwanja wa Ushirika, Moshi, mkoani Kilimanjaro.
Wananchi hao wanarejea katika mikikimikiki ya ligi kuu baada ya mapumziko ya kupisha michezo ya kimataifa ya timu za taifa (FIFA Break), huku wakiwa wametumia sehemu ya mapumziko hayo kufanya maandalizi kupitia kambi yao ya Zanzibar.
Kocha wa mipira ya kutenga wa Yanga, Kagisho Dikgacoi, amesema maandalizi ya kikosi hicho yamekwenda vizuri, huku akionyesha kuridhishwa na namna wachezaji wanavyopokea mbinu za kocha mpya.
βTunaamini timu ipo tayari kwa mchezo wa kesho dhidi ya Polisi Tanzania. Tulifanya maandalizi mazuri kupitia kambi yetu ya Zanzibar, ambapo wachezaji wameonesha mwitikio mzuri kwa kocha mpya na mbinu mpya za kiufundi tunazoanza kuzifanyia kazi,β amesema Dikgacoi.
Matumaini ya Yanga kufanya vizuri katika mchezo huo yameongezeka baada ya wachezaji waliokuwa kwenye majukumu ya timu zao za taifa kurejea kikosini na kuungana na wenzao.
Dikgacoi amesema wachezaji wameonyesha utayari mkubwa wa kujifunza na kuendana na mfumo mpya, huku kikosi hicho kikitarajiwa kufanya mazoezi ya mwisho leo kukamilisha maandalizi yake.
Hata hivyo, Yanga itapaswa kuwa makini dhidi ya Polisi Tanzania, ambayo ni miongoni mwa timu hatari katika matumizi ya mipira ya kutenga msimu huu.
Kwa mujibu wa takwimu za Ligi Kuu ya NBC, Polisi Tanzania imefunga mabao sita kupitia mipira ya kutenga, ikishika nafasi ya pili nyuma ya Simba yenye mabao manane, huku Yanga ikiwa na mabao matatu katika eneo hilo.
Mchezo huo utakuwa fursa kwa Yanga kuonyesha matunda ya maandalizi yaliyofanyika Zanzibar pamoja na mbinu mpya za benchi lake la ufundi.
Pazia la mchezo huo litafunguliwa saa 10:00 jioni, huku Wananchi wakilenga kuondoka Moshi na pointi zote tatu muhimu katika mbio za kuwania ubingwa wa Ligi Kuu ya NBC.