Pamoja na kukabiliwa na presha ya kupata matokeo wakati msimu ukiwa unaelekea ukingoni, Kocha Mkuu wa Yanga Nasreddine Nabi ameendelea kukifanya tathmini kikosi chake ili kufanya maboresho msimu ukimalizika
Uongozi wa Yanga ulimleta mapema Nabi ili aweze kufahamu mazingira pamoja na kutathmini kikosi kwa ajili ya maboresho ambayo atayafanya mwishoni mwa msimu
Eneo ambalo kila mmoja anatarajia kuwa na maboresho ni safu ya ushambuliaji
Kama ilivyokuwa kwa watangulizi wake, Nabi naye amekumbana na changamoto katika eneo hilo
Mwenyekiti wa Kamati ya Ufundi ya Yanga, Dominic Albinius ‘Baba Paroko’ amedokeza kuwa Nabi anapanga kusajili wachezaji wasiopungua watano katika safu ya ushambuliaji
"Kama klabu tunajua wapi pa kuanzia kwa msimu ujao na bahati nzuri ni kwamba kumleta kocha mapema kumeanza kuleta matunda kwa kocha kuanza kuonyesha anachotaka kwa msimu ujao," Albinus amenukuliwa na gazeti la Mwanaspoti
"Mpaka sasa ripoti ya awali ambayo Nabi ametueleza, anataka kuongeza mpaka wachezaji watano katika eneo la ushambuliaji na wengine kuwapisha wapya."
Albinus amesema eneo la ushambuliaji ndio litasimamiwa kwa umakini mkubwa ambapo washambuliaji wa kati mawinga na viungo wa pembeni wataongezwa
"Kocha anasema timu inatengeneza nafasi shida ipo katika kuzitumia kwahiyo lazima tuongeze watu wenye ubora zaidi. Huku kwingine kwa viungo wa pembeni nako anataka mtu mwenye ubora zaidi, kwasasa kama tunamkosa Kisinda (Tuisila) hakuna nguvu nyingine"
"Eneo la kiungo ushambuliaji wa kati nako kuna mtu anahitajika kocha anaona hakuna ubunifu wa kutengeneza nafasi nako tutatafuta mtu muafaka atakayekuwa na ubora wa kutengeneza nafasi eneo hilo," aliongeza Albinus
Msimu huu ulikuwa wa matumaini makubwa kwa wanachama na mashabiki wa Yanga, lakini ni wazi huenda ukamalizika pasipo matarajio ya wengi kufikiwa
Lakini kwa hakika ipo kazi imefanyika, wakati mwingine usajili ni bahati nasibu. Mchezaji anaweza kutamba klabu moja akashindwa kufanya hivyo kwenye klabu nyingine
Nabi ni kocha wa daraja la juu, anafahamu wapi anahitaji kupaboresha ili kutengeneza kikosi imara zaidi
Habari njema ni kuwa, wadhamini GSM wameahidi kutimiza mahitaji yote ya kocha ili msimu ujao Yanga irejee ikiwa imara zaidi ya msimu huu
