Alhamisi ya leo Julai 15 2021, kikosi cha Yanga kitashuka uwanja wa Benjamin Mkapa kuikabili Ihefu Fc ukiwa ni mchezo wa ligi kuu ya Vodacom
Huu ni mchezo maalum kwa Yanga na kiungo Haruna Niyonzima ambaye mchezo huo utatumika kumuaga rasmi baada ya kuitumikia Yanga kwa takribani misimu sita
Aidha siku ya leo kabla ya mchezo, Azam Media na Yanga watakuwa na jambo lao pale uwanja wa Benjamin Mkapa
Tukirudi kwenye mchezo wenyewe, Yanga inahitaji angalau alama moja tu ili kujihakikishia wanamaliza katika nafasi mbili za juu na kupata nafasi ya kushiriki michuano ya ligi mabingwa msimu ujao
Hata hivyo hautakuwa mchezo mwepesi, kwani Ihefu Fc nao wanazihitaji alama zote tatu ili kujinusuru na hatari ya kuteremka daraja
Katika mchezo wa leo huenda baadhi ya wachezaji waliokosekana kikosini kwa wiki kadhaa wakarejea
Nahodha Lamine Moro na Michael Sarpong walirejeshwa kikosini baada ya kumaliza changamoto na uongozi
Jana katika mkutano na Wanahabari, Mkufunzi wa makipa Razak Siwa alisema kwao bado ligi haijamalizika wanahitaji kuzipata alama zote sita kutoka katika michezo miwili iliyobaki wakianza leo dhidi ya Ihefu Fc
Ni saa kumi kamili jioni pale uwanja wa Benjamin Mkapa
