Kocha Mkuu wa Yanga Nasreddine Nabi kwa sasa ni mtu mwenye raha sana baada ya kazi yake kuanza kuonyesha matunda
Ndio! matunda yanaonekana kwani kwa sasa Yanga sio ile ambayo mashabiki walilazimika kushika mioyo yao kwa dakika zote tisini
Yanga ya Nabi sio ile butua butua aliyoiasisi Zlatko Krmpotic na sio ile ya Cedric Kaze ambayo ilikuwa ikikata 'moto' katika kipindi cha pili!
Yanga ya Nabi sio ile iliyokuwa ikitengeneza nafasi mbili ndani ya dakika 90, sasa nafasi za kufunga mabao zinatengenezwa kwa wingi
Yanga ya Nabi ina Feisal Salum 'fei Toto' aliyezaliwa upya ukilinganisha na yule Fei Toto aliyekuwa kipindi cha nyuma
Chini ya Nabi, Fei Toto ndiye nyota wa kikosi cha Yanga akiweka kambani mabao manne na kutoa pasi kadhaa za mabao
Wakati huu ni raha kuwa shabiki wa Yanga, kama uko uwanjani unakaa kwa kujiamini jukwaani kwani una uhakika utashangilia mabao
Kwa wale wanaoshuhudia mechi kupitia Azam Tv iwe nyumbani au 'vibanda umiza', utawakuta mapemaa wanasubiria 'mbungi' wakiwa na tabasamu nyusoni mwao
Hapa tunaizungumzia Yanga ya kocha Nasreddine Nabi ambayo imeshinda michezo saba mfululizo!
Huyu mwamba amepoteza mchezo mmoja tu dhidi ya Azam Fc, tena ulikuwa mchezo wake wa kwanza kabisa akiwa bado hajaingiza mbinu zake kwenye timu
Msimu unamalizika, Wananchi watarajie mambo mazuri zaidi msimu ujao kwani kama wachezaji hawa aliowakuta kawaboresha hivi je akiongeza na wake wapya itakuwaje?
