Afisa Habari wa Yanga Hassan Bumbuli amesema wamedhamiria kumaliza msimu kibabe kwa kuibuka na ubingwa wa kombe la Shirikisho la Azam (ASFC) kwa kuwafunga watani zao Simba baada ya kukosa ubingwa wa ligi kuu
Kikosi cha Yanga kilirejea jijini Dar es salaam jana wakitokea Dodoma ambako walikamilisha msimu wa ligi kuu kwa kulazimishwa suluhu ya bila kufungana dhidi ya Dodoma Jiji
Bumbuli amesema malengo waliyokuwa nayo wakati msimu unaanza ilikuwa kushinda kila taji waliloshiriki ikiwemo ubingwa wa ligi kuu
Hata hivyo wameshindwa kutwaa taji la VPL baada ya kupata sare nyingi katika mechi ambazo walipaswa kushinda
"Timu imerejea Dar es salaam na moja kwa moja kuingia kambini kwa ajili ya kujiandaa na mchezo wetu wa fainali dhidi ya Simba, huo ndiyo utakuwa mchezo wetu wa mwisho msimu huu na tumedhamiria kushinda ili kuwa mabingwa wa kombe la FA" alisema Bumbuli.
"Tumekosa ubingwa wa ligi kuu kutokana na makosa ambayo tuliyafanya, tulipata sare nyingi lakini yote kwa yote, sisi tumeyaacha, tunasonga mbele. Kama kauli mbiu yetu inavyosema, Yanga daima mbele nyuma mwiko, kwa hiyo tunaangalia yajayo wala si yaliyopita"
Yanga ndio timu pekee iliyofungwa michezo michache msimu uliomalizika, wakipoteza michezo miwili tu dhidi ya Coastal Union na Azam FC
Hata hivyo michezo waliyotoka sare ni 11, ambayo ndiyo iliyovuruga hesabu za ubingwa
