Chirwa aitwa arejee kazini

Mshambuliaji wa Yanga Obrey Chirwa bado ameweka ngumu kurejea kuitumikia Yanga licha ya makubaliano ya awali waliyofikia na uongozi wa Yanga.

Chirwa aliahidiwa kulipwa fedha zake za usajili kwa awamu lakini muhimu alitakiwa kurejea kuisaidia Yanga kwani kukosekana kwake tayari kunaonekana kukiathiri kikosi cha Yanga.

Katibu Mkuu wa Yanga Charles Mkwasa amesema si Chirwa tu anayeidai Yanga lakini wapo wachezaji wengi tu wenye madai lakini hawakugoma.

Amesema wachezaji hao wanamadai sawa na Chirwa (fedha za usajili) lakini wanalipwa mishahara na bonus kila mwezi kwa mujibu wa makubaliano ya mikataba yao.

Mkwasa amebainisha kuwa hakuna mchezaji atakayenyimwa stahiki zake, malipo yamekuwa yakifanywa kwa awamu.Lakini ni muhimu kwa kila mchezaji kuhakikisha anatimiza wajibu wake wakati madai yake yakiendelea kushughulikiwa.

Chirwa alirejea kwao nchini Zambia mwanzoni mwa mwezi Disemba 2017 wakati ligi iliposimama kupisha michuano ya kombe la Chalenji.

Alitarajiwa kurudi wiki iliyopita lakini mchezaji huyo aligoma kurejea hadi atakapolipwa pesa zake zote anazodai.

Mkataba wake na Yanga unamalizika mwishoni mwa msimu.