Ukiacha mchezo wa Ngao ya Jamii dhidi ya Simba ambao ulipigwa uwanja wa Benjamin Mkapa na Yanga kuibuka na ushindi wa bao 1-0, katika michezo miwili iliyofuata, Yanga ilikuwa na sura mbili tofauti hasa katika mchezo dhidi ya Kagera Sugar
Katika mchezo huo ambao ulipigwa uwanja wa Kaitaba na Yanga kushinda bao 1-0, Wananchi walikuwa bora sana kwenye kipindi cha kwanza lakini wakapunguza makali katika kipindi cha pili hasa baada ya kufanyika mabadiliko ya baadhi ya wachezaji
Hali kama hiyo ilijirudia katika mchezo dhidi ya Geita Gold, hasa katika dakika 30 za mwisho
Lakini haikuwa hivyo katika mchezo dhidi ya Simba, kwani Wananchi walikuwa bora zaidi kwenye kipindi cha pili kuliko walivyocheza kipindi cha kwanza
Katika mchezo dhidi ya Simba eneo la kiungo Yannick Bangala na Khalid Aucho walishirikiana vyema na Feisal Salum 'Fei Toto'
Bangala akarejeshwa kwenye safu ya ulinzi katika michezo dhidi ya Kagera Sugar na Geita Gold baada ya Bakari Nondo Mwamnyeto kupata majeraha ya kidole
Kwa kiasi kikubwa, kukosekana kwa Bangala katika eneo la kiungo ndio kunapelekea Yanga kupungua makali hasa Farid Mussa anapotoka katika kipindi cha pili
Farid amekuwa akitumika kama kiungo mchezeshaji sambamba na Aucho lakini bado hajawa na utimamu wa kucheza dakika zote hivyo mara nyingi katika kipindi cha pili huchoka
Zawadi Mauya ambaye ametumika kama mbadala wake, bado hajaweza kurejea katika makali aliyokuwa nayo msimu uliopita
Mwamnyeto atakapokuwa timamu na Bangala kurudishwa katika eneo la kiungo, bila shaka Yanga itacheza dakika 90 ikiwa na nguvu ileile kama walivyofanya kwenye mchezo dhidi ya Simba
Bangala ni mchezaji muhimu sana kwenye kikosi cha Yanga, ana mapafu ya mbwa!
Lakini pia Mukoko Tonombe amemaliza adhabu ya kukosa mechi tatu, ataongeza nguvu katika eneo la kiungo na hivyo kuipa Yanga uwiano mzuri kwa muda wote wa mchezo
