Wachezaji Shabani Djuma na Jesus Moloko wamerejea na kuungana na wenzao kambini kuendelea na maandalizi ya mchezo wa ligi kuu dhidi ya KMC ambao utapigwa wiki ijayo, Oktoba 19 uwanja wa Majimaji, Songea
Wachezaji hao walipewa ruhusa ya siku chache kurejea kwao DR Congo kuhuisha hati zao za kusafiria ambazo zilijaa
Moloko na Djuma walirejea jana lakini hawakuwa sehemu ya kikosi kilichocheza mechi ya kirafiki dhidi ya JKU na Yanga kuibuka na ushindi wa bao 1-0
Aidha nyota waliokuwa na majukumu ya timu za Taifa wanatarajiwa kuanza kurejea kambini
Kikosi cha timu ya Taifa ya Tanzania 'Taifa Stars' kilirejea mapema leo baada ya ushindi wa bao 1-0 dhidi ya Benin hapo jana
Wachezaji wa Yanga waliokuwa katika kikosi hicho ni Ramadhani Kabwili, Kibwana Shomari, Dickson Job, Bakari Nondo Mwamnyeto, Zawadi Mauya na Feisal Salum
Mlinda lango Djigui Diarra alikuwa na kikosi cha Mali ambacho kilikuwa Kenya jana kilipata ushindi wa bao 1-0 dhidi ya wenyeji wao
Khalid Aucho alikosa mchezo dhidi ya Rwanda akitumikia adhabu ya kadi mbili za njano
