Kwa sasa benchi la ufundi la Yanga chini ya Kocha Nasreddine Nabi wanafanya vizuri sana katika uchaguzi wa wachezaji wa kikosi cha kwanza
Yawezekana wapo baadhi ya wachezaji vipenzi wa mashabiki hawapati nafasi kulingana na vile benchi la ufundi linapanga, halipaswi kuwa jambo lenye mjadala kwa sababu timu inafanya vizuri
Utamaduni wa makocha wote duniani, hawabadili timu zinazowapa matokeo labda itokee changamoto ya kadi na majeruhi
Nabi tayari amepata kikosi chake cha kwanza ambacho kimempa ushindi katika michezo minne mfululizo kwenye ligi
Hana sababu ya kufanya mabadiliko ambayo yanaweza kuathiri uchezaji wa timu yake
Wachezaji wanaoanza sasa kwenye kikosi cha kwanza wamezoeana, kila mmoja anafahamu wapi anapaswa kuwa na wakati gani
Kuna wachezaji kama Saido Ntibazonkiza, Mukoko Tonombe, Heritier Makambo, Zawadi Mauya na wengine wanalazimika kusubiri nje
Sio kwa sababu hawana uwezo, lahasha, kwa sababu kuna wenzao wanafanya vizuri katika nafasi wanazocheza
Pia kuna changamoto ya wachezaji nane wa kigeni ambao wanapaswa kuanza katika mchezo mmoja
Nyota wa kigeni wengine wanalazimika kubaki nje kutokana na kanuni hii
Makambo na Saido hawakuwa sehemu ya kikosi kilichoikabili Azam Fc Jumamosi, pengine leo wanaweza kubaki nje katika mchezo dhidi ya Ruvu Shooting pia
Makambo amekuwa na wakati mgumu kupata nafasi mbele ya Fiston Mayele ambaye amefunga katika mechi mbili zilizopita
Saido hajaweza kuingia katika kikosi cha mechi kabisa kutokana na nafasi anayocheza kuwa na wachezaji wanaofanya vizuri
