Juzi baada ya nahodha msaidizi Mukoko Tonombe kuifungia Yanga bao la tatu katika mchezo dhidi ya Ruvu Shooting, ni kama alizidiwa na furaha na kujikuta akitokwa na machozi
Mukoko ambaye msimu uliopita alichaguliwa kuwa mchezaji bora wa Yanga huku akiingia kwenye kikosi bora cha TFF, amesema kutokana na mapito aliyokumbana nayo karibuni, alijikuta akifikwa na hali hiyo
Nyota huyo kutoka DR Congo amesema tangu atolewe kwa kadi nyekundu kwenye mchezo wa fainali ya kombe la Shirikisho msimu uliopita, tukio lile lilimvuruga na kuchangia kumuondoa mchezoni
Aidha Mukoko alilazimika kukosa mechi tatu za mwanzo wa msimu na hakuweza kurejea kikosini baada ya viunga Khalid Aucho na Yanick Bangala kuwa katika uwezo wa juu sana
"Nikwambie, nimepita wakati mgumu tangu mchezo niliopewa kadi nyekudu (fainali FA), mambo hayakuwa mazuri katika maisha yangu ya soka"
"Kuna wakati nilijikuta nakata tamaa na kulia nikiwa peke yangu kambini na hata nyumbani. Ndio maana nilipofunga bao nilijikuta nalia kwa furaha ambayo ilichanganyikana na huzuni"
"Nawashukuru mashabiki wa Yanga ambao walikuwa nami katika kipindi chote kigumu. Nawaahidi nitaendelea kuwapa furaha," alisema Mukoko
