Vinara wa ligi kuu ya NBC Yanga jioni ya leo watakuwa uwanjani pale Ilulu mkoani Lindi kuikabili Namungo Fc ukiwa ni mwendelezo wa mikiki mikiki ya ligi kuu ya NBC
Ni mchezo wa kwanza baada ya mapumziko ya kalenda ya michuano ya Kimataifa, Wananchi wakidhamiria kuendeleza wimbi la ushindi
Timu pekee ambayo haijapoteza mchezo msimu huu inakutana na Namungo Fc, moja ya timu ngumu hasa inapocheza kwenye uwanja wake wa nyumbani
Wananchi wako mkoani Lindi tangu juzi ambapo jana walifanya mazoezi yao ya mwisho katika uwanja wa Ilulu ambao utatumika baadae katika mchezo huo
Yanga imekuwa na maandalizi mazuri kuelekea mchezo huo wakipata nafasi ya kushiriki maadhimisho ya Mwaka mmoja wa Rais wa Zanzibar Dk Hussein Ali Mwinyi visiwani Zanzibar ambako walicheza mechi mbili za kirafiki
Kocha Mkuu wa Yanga Nasreddine Nabi amesema vijana wake wako tayari kuelekea mchezo huo huku akibainisha kikosi chake leo kitakuwa na mabadiliko kadhaa
Mshambuliaji Yacouba Songne, atakosekana baada ya kufanyiwa upasuaji wa goti, jeraha ambalo litamuweka nje kwa miezi mitano
Lakini pia kiungo Khalid Aucho alipata marjeraha wakati akiwa kwenye majukumu ya timu ya Taifa ya Uganda
Hivyo kikosi cha Nabi kitakuwa na mabadiliko hayo mawili ya lazima
Yanga inahitaji kushinda ili kuendelea kujikita kileleni mwa msimamo wa ligi
