Kaimu Mtendaji Mkuu wa Yanga Senzo Mazingisa amewapongeza wachezaji na benchi la ufundi kwa kufanikiwa kuondoka na alama zote sita baada ya kupata ushindi mkoani Tanga na Arusha
Yanga iliichapa Coastal Union mabao 2-0 mkoani Tanga kabla ya kuichapa Polisi Tanzania bao 1-0 hapo jana katika mchezo uliopigwa uwanja wa Sheikh Amri Abeid
Katika misimu iliyopita ilikuwa sio rahisi kwa Yanga kupata alama tatu dhidi ya Coastal Union na Polisi Tanzania katika viwanja vyao
Ushindi katika michezo hiyo umeongeza matumaini kwa Yanga katika mpango wao wa kutwaa ubingwa msimu huu
"Kwa kweli nawapongeza wachezaji wetu na benchi la ufundi kwa mafanikio haya. Sio jambo rahisi kupata alama sita dhidi ya timu bora zenye historia ya kutusumbua kila msimu"
"Hii ni dalili njema kwetu katika mpango wa kuwania ubingwa msimu huu. Bado safari ni ndefu lakini tunakwenda vizuri," alisema Senzo muda mfupi baada ya kurejea kutoka Arusha
Yanga imejichimbia kileleni mwa msimamo wa ligi baada ya kufikisha alama 35, alama 1o mbele ya Simba inayoshika nafasi ya pili
Vinara hao wa ligi tayari wamerejea jijini Dar es salaam kujiandaa na mchezo wa kombe la FA dhidi ya Mbao Fc ambao utapigwa Januari 29, uwanja wa Benjamin Mkapa
