Katika dirisha dogo la usajili Yanga imeongeza takribani nyota sita, wachezaji watano wakiwa wa ndani na mmoja kutoka nje ya nchi
Aboutwalib mshery, Ibrahim Bacca, Denis Nkane, Salum Abubakar na Crispine Ngushi hawa ni wachezaji wa ndani wakati Chico Ushindi ndiye mchezaji pekee kutoka nje ya nchi
Baada ya Yacouba Songne kupata majeraha ambayo yatamuweka nje pengine mpaka msimu ujao, Yanga ilihitaji kusajili mchezaji wa kuziba nafasi yake wakati yeye akiendelea na matibabu ili aweze kurejea akiwa imara
Nkane na Ushindi wamesajiliwa wakiwa ni mawinga na hii inakwenda kuongeza ushindani katika nafasi za pembeni wakiwapa changamoto, Saido Ntibazonkiza, Jesus Moloko na Dickson Ambundo
Kocha Mkuu wa Yanga Nasreddine Nabi amesema ujio wa wachezaji hao utakuwa na faida kwa Yanga kwani kila mchezaji ana sifa yake maalum
"Moloko ni mzuri kwenye kukimbia na kuwalazimisha mabeki hata muda mwingine kuchezewa faulo, anaweza kutengeneza nafasi za kufunga na muda mwingine hufunga mwenyewe ndio maana mpaka sasa kwenye ligi amefunga matatu"
"Ntibazonkiza anaweza kukokota mpira kutokea pembeni na akapiga pasi ya bao au kufunga mwenyewe ndio maana mpaka sasa amefunga manne, anaweza kupiga mipira iliyokufa kama kosa na faulo ambazo zinazaa mabao, muda mwingine hucheza kutokea katikati kama kiungo,” alisema Nabi
"Huyu Nkane nilimuona akiwa na Biashara United, amesajiliwa na Yanga nimempa nafasi kwenye Mapinduzi amefanya vizuri ikiwemo kufunga bao hiyo ni mapema itakuaje akiwa ndani ya kikosi kwa muda mrefu na akazoea, maana yake atakuwa bora zaidi"
"Ambundo nilikuwa nae kwenye mazoezi baada ya kupata majeraha nyakati tofauti alikuwa anaonyesha kiwango bora na kutimiza majukumu yake vile ambavyo nahitaji, nilimpa nafasi kwenye Mapinduzi amefanya vizuri"
"Katika kuonyesha anatamani kucheza zaidi hakuridhika na ubora wake bali alifanya zaidi mazoezini, kwenye mechi ngumu ya ligi dhidi ya Polisi Tanzania na akafanya vizuri zaidi ya vile mazoezini na akafunga bao muhimu," aliongeza Nabi
Nabi amemtaja Chico Ushindi kama mchezaji mwenye uzoefu zaidi akishiriki katika michuano ya Kimataifa hivyo nae atakuwa na mchango tofauti
"Ushindi aina yake ya uchezaji ni tofauti kabisa na wale wengine waliokuwepo katika kikosi na akizoea mazingira ataofa vitu,anatengeneza nafasi za kufunga, kufunga mwenyewe na kuhusika katika mabao. Wala sina wasi wasi tunamechi nyingi msimu huu kwenye kombe la Shirikisho (ASFC) na Ligi Kuu Bara"
