Kocha Mkuu wa Yanga Nasreddine Nabi amesema ili wajihakikishie kushinda mechi zao wanapaswa kutumia vyema nafasi wanazotengeneza na kufunga mabao mengi
Kumekuwa na malalamiko kuwa Yanga inakabiliwa na changamoto ya makosa ya waamuzi katika michezo yao ambapo wakati mwingine wamefunga mabao yakakataliwa au maamuzi ambayo yanawanyima fursa ya kufunga wanapokuwa katika nafasi nzuri
Baada ya mchezo wa ligi kuu dhidi ya Mbeya City uliomalizika kwa suluhu ya bila kufungana, Nabi hakufurahishwa na matokeo hayo hasa ikizingatiwa Yanga ilinyimwa nafasi mbili adimu za kufunga mabao mojawapo ikiwa ya Mayele kwa tukio la 'offside' ambayo haikuwa sahihi
Waamuzi wa mchezo huo walisimamishwa na Kamati ya saa 72 baada ya kushindwa kutafsiri sheria za soka
"Baada ya matukio yale, nililazimika kuzungumza na wachezaji kuwaambia kuwa tunapaswa kufunga mabao mengi katika nafasi tunazotengeneza ili hata ikitokea mengine yakikataliwa hatuathiriki. Nimefurahi vile walivyocheza mchezo wa Biashara United "
"Licha ya kukataliwa bao mapema wachezaji waliendelea kupambana na tukafanikiwa kufunga mabao mengine mawili. Nampongeza Mayele (Fiston) kwani amekuwa kiongozi mzuri wa mapambano yetu"
"Mchezaji mwenye moyo mwepesi baada ya kukataliwa kwa bao angeweza kutoka mchezoni na kukata tamaa kwa mambo ambayo pia yalitokea hapa kati, lakini kwake sio hivyo," alisema Nabi
Kutokana na mfululizo wa kutotendewa haki na waamuzi katika michezo yao, viongozi wa Yanga walilazimika kujitokeza kuzungumzia sintofahamu hiyo ambapo pamoja na kuadhibiwa, lakini TFF iliitisha semina ya siku tatu kwa ajili ya waamuzi
Hata hivyo pamoja na semina hiyo bado makosa yameendelea kujitokeza, kwenye mchezo dhidi ya Biashara United yapo maamuzi kadhaa ya waamuzi hasa wa pembeni kuamuru makosa ya kuotea katika matukio ambayo hayakuwa sahihi
Aidha Simba iliyolalamikiwa kunufaika zaidi na makosa ya waamuzi, ikaendelea kunufaika kwenye mchezo dhidi Ruvu Shooting, mabao mawili kati ya saba waliyofunga, wafungaji walikuwa katika maeneo ya kuotea
Serikali imeahidi kufunga teknolojia ya VAR kwa kuanzia katika viwanja vitano vyenye ubora huku mpango wa kuboresha viwanja vyote ukiwa umeanza baada ya TFF na Chama cha Mapinduzi kuingia makubaliano ya maboresho ya viwanja vyote vinavyomilikiwa na chama hicho
