Kocha Msaidizi wa Yanga Cedrick Kaze amesema wanahitaji kupambana katika duru ya pili katika ligi kuu ya NBC kuhakikisha wanafanya vizuri zaidi walivyomaliza duru ya kwanza
Yanga imekamilisha mechi za mzunguuko wa kwanza pasipo kupoteza mchezo, wakishinda michezo 12 na kutoka sare michezo mitatu, wamefikisha alama 39 wakiongoza ligi kwa tofauti ya alama nane
Walikamilisha mchezo wa mwisho kibabe kwa kuichapa Mtibwa Sugar mabao 2-0 katika mchezo uliopigwa uwanja wa Manungu Complex
Kaze amesema kwao hawafikirii nini wamefanya kwenye duru ya kwanza kwani matokeo hayo hayatakuwa na maana kama watashindwa kutimiza malengo waliyojiwekea ambayo ni kutwaa ubingwa
"Sitazungumza kuhusu rekodi za raundi ya kwanza ya ligi kwa sababu sio muhimu. Hata ukiwa na rekodi nzuri sana katika raundi ya kwanza, haitakuwa na maana kama mwishoni mwa ligi hutashinda vikombe," alisema Kaze
Yanga itaanza mechi za raundi ya pili Jumapili, Februari 27 kwa mchezo dhidi ya Kagera Sugar ambao utapigwa uwanja wa Benjamin Mkapa
