Mshambuliaji wa zamani wa Yanga Hamis Kizza ambaye sasa anaitumikia Kagera Sugar, amemtabiria mambo makubwa Fiston Mayele, mshambuliaji kiongozi katika kikosi cha Yanga
Mwishoni mwa wiki Yanga ilicheza na Kagera Sugar uwanja wa Benjamin Mkapa, Mayele akifunga mabao mawili na kumkaribia kinara wa upachikaji mabao ligi kuu baada ya kufikisha mabao tisa
Reliants Lusajo wa Namungo Fc ndiye anayeongoza mbio za kuwania kiatu cha dhahabu msimu huu akiwa amefunga mabao 10
Kizza amesema kwa jinsi Yanga inavyocheza, Mayele ataendelea kufunga mabao kwani wachezaji wenzake wanafahamu vile wanapaswa kumtumia
Kizza ambaye pia amewahi kuichezea klabu ya Simba, amesema hatashangaa kama Mayele ataibuka mfungaji bora wa ligi kuu msimu huu
"Ni mshambuliaji mzuri, wenzake pia wanajua kumtengenezea nafasi. Nafikiri atafanya mengi mazuri katika msimu huu, sitashangaa akiwa mfungaji bora"
"Yanga mashambulizi yao wanayatumia kupitia pembeni kwa maana ya kupiga krosi ambazo zote wanampigia Mayele, ni kitu ambacho wanaonekana kukifanyia kazi mazoezini," alisema Kizza
Mayele amekuwa na msimu mzuri mpaka sasa akiwa na Yanga kwani amefunga katika robo tatu ya michezo ambayo ametumika
Kwa sasa Mayele ndiye mshambuliaji anayezungumzwa zaidi kutokana na umahiri wake wa kufunga lakini pia akileta aina ya ushangiliaji ambao umewafurahisha wengi
