Kocha Msaidizi wa Yanga Cedrick Kaze amesema kiungo mshambuliaji Saido Ntibazonkiza amekuwa katika kiwango bora baada ya kupona majeraha yaliyokuwa yakimsumbua mara kwa mara
Ntibazonkiza alisajiliwa na Yanga katika dirisha dogo la usajili msimu uliopita lakini muda mwingi alkaa nje kutokana na majeraha hayo
Tangu kuanza kwa msimu huu Saido ameimarika na sasa amejihakikishia nafasi kwenye kikosi cha kwanza, akionyesha thamani yake kikosini
Amehusika katika mabao 10 yaliyofungwa na Yanga kwenye ligi akifunga mabao sita na kutoa pasi nne za mabao
Ukimtoa Fiston Mayele ambaye amehusika katika mabao 12, anayefuata ni Saido
Kaze amesema Saido ni mzoefu wa ligi za Afrika hivyo akiwa fiti kifiziki amekuwa akifanya mambo ya tofauti sana uwanjani akishirikiana na wenzie wanaomwelewa vilivyo kuanzia mazoezini
"Saido akiwa vizuri kwenye fiziki ni mchezaji mzuri sana, ana akili ya mpira na anajua kuamua mechi. Yeye na wenzake wana morali kubwa ya kupigania mafanikio na kulinda hadhi ya Yanga. Bado tuna mwendo mrefu lakini angalau njia inaonekana kufikia mafanikio," alisema kaze
