Dabi ya watani wa jadi ndio mchezo mkubwa zaidi ambao ni ndoto kwa kila mchezaji wa Yanga au Simba kushiriki mchezo huo
Jumamosi ya wiki hii, April 30 Yanga itakuwa mwenyeji wa mchezo wa duru ya pili ligi kuu ya NBC ambao utapigwa uwanja wa Benjamin Mkapa
Ni mchezo ambao matokeo ya ushindi kwa Yanga yatawaweka katika nafasi nzuri zaidi ya kutwaa ubingwa msimu huu wakiongoza katika msimamo wa ligi kwa tofauti ya alama 13 dhidi ya watani zao Simba wanaoshika nafasi ya pili
Kocha Mkuu wa Yanga Nasreddine Nabi amesema wachezaji wake wako tayari kwa mchezo huo, mpaka sasa ni mchezaji mmoja tu, Yacouba Songne ndiye atakosekana
Nabi amesema ataingia kwenye mchezo huo akiwa na kikosi chake kamili, kila mchezaji akitamani kuwa sehemu ya kikosi kitakachoshuka dimba la Mkapa
"Tuna timu kamili nafikiri hii itakuwa sapraizi ya kwanza sijajua tumtumie mchezaji gani kuelekea mechi hii. Kila mtu yuko tayari na wachezaji wanataka kucheza hii mechi," alisema Nabi
"Tutamkosa Yacouba (Songne) pekee, lakini tuna nafasi kubwa ya kuchagua watu bora ambao tutawaona wako tayari kutupa ushindi. Hii ni mechi ambayo tunatakiwa kushinda kwa namna yoyote"
Nabi amesema kuna kitu kigumu kitawaumiza wao kama makocha ni kuchagua wachezaji ambao watacheza eneo la kiungo ambapo hii inaweza kuwasaparaizi hata wachezaji wenyewe mbali na mashabiki
"Kuna kazi kubwa kuchagua viungo wa kucheza hiyo mechi nafikiri hili ndio gumu zaidi, tutakuwa tofauti zaidi nilisema kabla kwamba ubora wetu uko katika eneo la kiungo, na kurejea kwa Aucho na Feisal kunaleta nguvu zaidi kwenye timu yetu"
"Nilifurahi kuona mchezo uliopita (dhidi ya Namungo) Feisal na Aucho walimaliza vizuri bila kuonekana shida ya afya yao hii ni nafasi nyingine ya kupata timu iliyokamili," aliongeza Nabi katika mahojiano na gazeti la Mwanaspoti
