Kikosi cha Yanga jioni ya leo majira ya saa 10 kitashuka uwanja wa Jamhuri mkoani Dodoma kuikabili Dodoma Jiji katika mchezo wa ligi kuu ya NBC
Kwa hakika huu ni mchezo muhimu sana kwa Yanga kupata ushindi ili kuendelea kujiweka katika nafasi nzuri ya kutwaa ubingwa
Yanga imecheza dakika 270 pasipo kufunga goli, leo wanahitaji kumaliza ukame huu na kupunguza presha kwenye mechi zilizosalia
Katika michezo saba iliyobaki, Yanga inahitaji kushinda angalau michezo minne ili kuwa na uhakika wa kutwaa ubingwa
Hakuna mchezo rahisi miongoni mwa michezo yote iliyobaki kwa kuwa kila timu itacheza ikihitaji matokeo mazuri
Wakati Yanga ikihitaji matokeo ili kutwaa ubingwa, timu watakazokutana nazo zitahitaji matokeo kujiepusha na hatari ya kuteremka daraja au kuwania nafasi ya kumaliza katika nne bora kwenye msimamo wa ligi
Mechi zilizosalia ni fainali kwelikweli, wakianza na mchezo dhidi ya Dodoma Jiji leo
Yanga ilipata muda mzuri wa kujiandaa na mchezo huo baada ya kulazimishwa suluhu ya bila kufungana na Tanzania Prisons katika mchezo uliopigwa uwanja wa Benjamin Mkapa Jumatano iliyopita
Kocha Mkuu wa Yanga Nasreddine Nabi alisafiri na kikosi chake kamili licha ya kuwa huenda asimtumie kiraka Yannick Bangala ambaye amepata msiba wa kufiwa na kaka yake
Hautakuwa mchezo rahisi lakini hakuna matokeo ambayo Yanga inahitaji zaidi ya ushindi
