Kabla ya kuikabili Simba katika mchezo wa nusu fainali kombe la FA, May 28 vinara wa ligi kuu ya NBC Yanga watacheza mechi mbili muhimu za ligi
Yanga ikiwa kileleni mwa msimamo wa ligi na alama 60, ushindi katika michezo hiyo miwili utawafanya wafikishe alama 66 na pengine kuhitaji alama nyingine tano tu kutangaza ubingwa
Ijumaa ya wiki hii Yanga itaikaribisha Mbeya Kwanza katika mchezo utakaopigwa May 20 katika uwanja wa Benjamin Mkapa
Baada ya mchezo huo, Yanga itakwea pipa kuelekea jijini Mwanza ambako wanakabiliwa na mchezo dhidi ya Biashara United ambao utapigwa May 23 katika uwanja wa CCM Kirumba
Ni ratiba yenye changamoto lakini kwa hakika kama kocha Nasreddine Nabi na vijana wake watafanikiwa kushinda mechi hizi, watapiga hatua muhimu sana kuelekea ubingwa wa 28
Msemaji wa Yanga Haji Manara amesema wameweka mkakati wa kuhakikisha wanapata matokeo katika michezo hiyo kwani hawahitaji kutegemea matokeo ya watani zao kuweza kushinda ubingwa
"Tuna nafasi nzuri ya kutwaa ubingwa lakini hatupaswi kubweteka kwani bado kazi haijamalizika. Michezo hii inayofuata ina umuhimu mkubwa kwetu kupata alama zote sita. Tunahitaji kushinda mechi zetu kujihakikishia ubingwa pasipo kujali matokeo ya wapinzani wetu, " alisema Manara
Yanga inahitaji alama 11 tu katika michezo sita iliyobaki ili kujihakikishia ubingwa wa 28
Baada ya michezo ya nusu fainali kombe la FA, Ligi itasimama kwa takribani wiki tatu kupisha kalenda ya CAF mechi za timu za Taifa kuwania kufuzu fainali za Afcon 2023
