Kocha Mkuu wa Yanga Nasreddine Nabi amesema wamejiandaa vyema kuelekea mchezo wa nusu fainali kombe la Shirikisho la Azam (ASFC) dhidi ya Simba ambao utapigwa kesho Jumamosi katika uwanja wa CCM Kirumba
Nabi amesema wanapaswa kuchukua tahadhari kubwa katika mchezo huo kwani wanakutana na timu ambayo inaweza kutumia makosa kuwaadhibu
"Tumejiandaa kikamilifu kwa ajili mchezo huu. Tutacheza kwa tahadhari kubwa kuhakikisha tunapata matokeo yatakayotupeleka hatua ya fainali"
Nabi amesema nidhamu ya wachezaji ndio iliyowapa mafanikio waliyopata mpaka sasa msimu huu, ni muhimu kwa wachezaji kuzingatia
"Nilisema wakati nafika hapa Tanzania mara ya kwanza, hakuna kitu muhimu kama nidhamu kwa wachezaji na hata sisi makocha na wasaidizi wangu wengine"
"Kuna staa mmoja tu kwenye klabu hii ambaye ni Yanga na sio mimi au mwingine. Tunaendelea na maandalizi, kitu muhimu ambacho nimewaambia wachezaji ni kujituma kuanzia kwenye maandalizi mpaka kwenye mechi, tumekuwa tunashinda kwa nidhamu yetu kama timu na sio nguvu ya mtu mmoja," alisema Nabi
Nabi amesema wachezaji Dickson Ambundo na Saido Ntibazonkiza ni mara yao ya kwanza kufanya makosa, wameadhibiwa lakini bado ni wachezaji wa Yanga
Nae kiungo Deus Kaseke akizungumza kwa niaba ya wachezaji wenzake, amesema morali yao iko juu akiwataka mashabiki wajitokeze kwa wingi kuishangilia timu yao siku ya Jumamosi
