Kiungo wa Yanga, Feisal Salum 'Fei Toto', aliyefunga bao pekee kwenye mechi ya nusu fainali ya Kombe la FA dhidi ya Simba, amefichua kuwa aliwasoma vizuri viungo wa Simba na kubaini madhaifu yao ambayo aliyatumia kuwaadhibu
Fei Toto alifunga bao hilo dakika ya 25 ya mchezo kwa shuti kali la mbali, amesema aliwafanyia mazoezi ya siku tatu viungo wa Simba, baada ya kugundua kuwa hawana kasi.
Fei Toto anayesifika kwa kupiga mashuti ya mbali, alisema kuwa hawakuwa na muda mrefu wa kujiandaa na mechi hiyo, lakini walitumia siku tatu kuisoma Simba, ndipo alipogundua udhaifu huo.
"Nilikuwa nawaangalia viungo wa Simba wanavyocheza, uzuri wao na udhaifu wao, kuna baadhi ya wachezaji wanaocheza eneo la kiungo hawana kasi, ni wachezaji wazuri, lakini wana udhaifu huo, hivyo nikatafuta ni jinsi gani ya kuutumia udhaifu huo"
"Siyo kila mchezaji amekamilika, hata mimi nina madhaifu yangu," alisema Feisal
Aidha kiungo huyo wa timu ya Taifa ya Tanzania 'Taifa Stars' amesema siri ya kupiga mashuti ni mazoezi binafsi ambayo anayafanya, lakini pia uthubutu kwani siyo kila shambulizi ni lazima wachezaji wafike hadi kwa golikipa.
"Nimefunga mabao haya msimu huu kama matatu hivi, unajua kuna maeneo ukisogea unaona umjaribu kipa, golikipa naye ni binadamu, zingine zinakataa, zingine huwa zinakubali. Nilisogea nikaona sikabwi, na kuna nafasi ya kupiga, nikapiga"
Fei Toto amekuwa na kawaida ya kufunga mabao kwa mashuti makali msimu huu akifunga mabao ya aina hiyo pia katika michezo ya ligi kuu dhidi ya KMC na Ruvu Shooting
