Kuna watu walishangilia zilipoibuka tetesi kuwa mshambuliaji Fiston Mayele atajiunga na klabu ya Kaizer Chiefs
Hata hivyo Yanga imeweka bayana kuwa haina mpango wa kumuuza Mayele ambaye bado ana mkataba wa mwaka mmoja na Wananchi
Unajua kwa nini walifurahi baada ya kusikia Mayele anaondoka?
Msimu uliomalizika Yanga ilianza kuhesabu taji la kwanza kwenye Ngao ya Jamii, wakiwachapa Simba bao 1-0 katika mchezo uliopigwa uwanja wa Benjamin Mkapa
Ulikuwa mchezo wa kwanza kabisa kwa Mayele kujitambulisha rasmi kwenye soka la Tanzania
Baadae ikawa historia kwake kwani alijijengea umaarufu wa aina yake akimaliza msimu akifunga mabao 16 kwenye ligi pia akitoa pasi tano za mabao
Msimu huu tena utaanza kama ilivyokuwa msimu uliopita, mchezo wa Ngao ya Jamii dhidi ya Simba ambao utapigwa August 13
Mayele amepania kun'gara katika mchezo huo kama alivyofanya msimu uliopita
Nyota huyo kutoka DR Congo amesema wakati huu watachuana na Simba wakiwa imara zaidi kwani watapata muda wa kutosha kufanya maandalizi
"Tunatarajia kuwa na mchezo mgumu na wa ushindani mkubwa dhidi ya Simba, ila ukweli naamini safari hii tutawashangaza zaidi"
"Timu inatakiwa kujiandaa vyema ili kupata kile tunachostahili. Nakumbuka msimu ulioisha kwenye Ngao ya Jamii nilichezeshwa nikiwa sijafanya maandalizi ya kutosha kutokana na kubaki Morocco kwa janga la Uviko-19, ila wakati huu nitakuwa fiti sababu tuna muda wa kutosha kujiandaa," alisema Mayele
Wachezaji wa Yanga wanaingia kambini leo Avic Town ambapo siku ya kesho wataanza rasmi maandalizi ya msimu ujao
