Wazee wa klabu ya Yanga wamewaagiza viongozi wa Matawi kukutana kwa dharura ili kutoa maazimio ya hatua za kuchukua kufuatia kufungiwa kwa msemaji wa klabu hiyo, Haji Manara
Mkutano huo wa viongozi wa Matawi utafanyika leo Jumamosi, Makao Makuu ya klabu Jangwani jijini Dar es salaam
Wakizungumza na Wanahabari mapema leo, Wazee walieleza kusikitishwa na hatua iliyochukuliwa na Kamati ya Maadili kumfungia Manara miaka miwili pamoja na faini ya Tsh Milioni 20
"Tunaamini katika hukumu hii kuna shinikizo la Waziri wa Michezo (Mh. Mohammed Mchengelwa) kwani siku ya kutolewa tuzo za ligi kuu aliagiza Manara achukuliwe hatua kali jambo ambalo sisi tunaona sio sahihi"
"Lakini pia Manara alizozana na Rais wa TFF Karia, ila tunashangaa aliyeitwa mbele ya Kamati na kuchukuliwa hatua ni mtu mmoja tu?," alihoji Mzee Mohammed Msumi
Wazee wanaamini adhabu iliyotolewa ni kubwa na wanadhani busara ingeweza kutumika kumaliza shauri hilo
"Walifungiwa akina Mwakalebela lakini baadae Serikali ikaingilia kati na busara ikatumika kumaliza shauri lile. Kwa nini busara hiyo haikutumika kumaliza shauri hili la Manara ambalo sisi tunaona ni watu wawili ambao walizozana kutokana na presha ya mchezo kati ya Yanga dhidi ya Coastal Union?," alisema Mzee Msumi
Wazee wamesema wataomba kwenda kuonana na Rais wa nchi Mh Mama Samia Suluhu Hassan kama jambo hili halitapatiwa mwafaka haraka
Wazee wanaamini Manara amefungiwa kimkakati ili kuivuruga Yanga kuelekea Tamasha la Wiki ya Mwananchi
"Kuna kesi nyingi mbele ya kamati ya Maadili mpaka leo hazijatolewa hukumu lakini hii ya Manara hukumu yake imetolewa haraka"
