Kocha Mkuu wa Yanga Nasreddine Nabi amesema kikosi chake kiko tayari kwa mchezo wa ligi kuu dhidi ya Azam Fc ambao utapigwa kesho Jumanne katika uwanja wa Benjamin Mkapa
Akizungumza na waandishi wa habari mapema leo kuelekea mchezo huo, Nabi amesema wamefanya maandalizi ya kutosha kuelekea mchezo huo ambao wamedhamiria kushinda
"Tumepata muda mzuri wa kufanya mazoezi pamoja wakati wa mapumziko wa mechi za Kimataifa. Tulikuwa na muda mfupi wa pre-season hivyo wakati huu tumeutumia vizuri kujiimarisha"
"Nafurahi wachezaji wameonyesha utayari kuelekea mchezo dhidi ya Azam. Nimepata nafasi ya kuwaangalia Azam Fc katika michezo yao, nafikiri utakuwa mchezo mzuri na wenye ushindani," alisema Nabi
Akizungumzia afya za wachezaji wake, Nabi amesema Djuma Shabani alikuwa akisumbuliwa na maralia lakini alianza mazoezi jana pia mlinda lango Djigui Diarra ambaye alikuwa majeruhi nae ameanza mazoezi
"Tutawaangalia kwenye mazoezi ya mwisho leo, kuona kama tutaweza kuwatumia hapo kesho"
Nabi pia amebainisha wachezaji waliokuwa na majukumu ya timu ya Taifa nao watafanya mazoezi ya mwisho na wenzao leo
