Klabu ya Yanga inakamilisha mchakato wa kuajiri Afisa wa Habari ambaye atakabidhiwa mikoba iliyoachwa na Hassan Bumbuli aliyemaliza mkataba
Makamu wa Rais wa Yanga Arafat Haji amesema kila kitu kinakwenda vizuri na kuwa watatangaza pale mchakato huo utakapokamilika
Aidha Arafat amesema Yanga inaendesha mchakato wa kujaza nafasi ya Afisa Habari kwa kufuata kanuni na taratibu walizojiwekea ikiwemo kukidhi matakwa ya kikatiba
"Yanga haiweza kupangiwa mtu wa kumuajiri hivyo Wananchi wafahamu mchakato unaendelea vizuri na karibuni tutatangaza," alisema
Hivi karibuni kumeibuka marumbano kwenye mitandao ya kijamii baadhi ya wachambuzi wakimtuhumu aliyekuwa Msemaji wa Yanga Haji Manara kukwamisha kuajiriwa kwa moja ya wachambuzi mwenzao(Jina kapuni)
Hata hivyo Manara aliwajibu wachambuzi hao akihoji imekuwaje wakati huu wanapigia debe nafasi hiyo wakati mwanzoni walikuwa wakiponda utaratibu wa klabu kuwa na wasemaji wakitolea mfano huko Ulaya timu hazina wasemaji
Manara amesema yeye hahusiki na mchakato huo kwa kuwa amefungiwa miaka miwili na TFF ingawa bado ni mwajiriwa wa Yanga
"Yanga haiwezi kupangiwa imuajiri nani, itaajiri kwa kufuata taratibu na utamaduni wa klabu yetu," alisema Manara
