Mshambuliaji kinara wa mabao katika kikosi cha Yanga Fiston Mayele amesema hawana hofu yoyote kuelekea mchezo wa ligi ya mabingwa dhidi ya Al Hilal ambapo mkondo wa kwanza utapigwa uwanja wa Benjamini Mkapa, Oktoba 08 2022
Yanga iliwaondoa Zalan Fc katika hatua ya awali ya michuano hiyo kwa ushindi wa jumla wa mabao 9-0 na sasa wanahitaji kupata ushindi mwingine dhidi ya Al Hilal ili waweze kutinga hatua ya makundi
Mayele amesema ubora na uzoefu wa kikosi chao unawapa jeuri na kuamini wanaweza kupata ushindi dhidi ya Al Hilal na kuwa hawana hofu yoyote kuelekea mchezo huo
"Hatuna hofu yoyote kuelekea mchezo dhidi ya Al Hilal, tunao wachezaji kama Bangala (Yannick), Morrison (Bernard), Aziz Ki, Djuma Shabani na wengine wenye uzoefu wa michuano hii mikubwa. Mimi nilicheza nikiwa AS Vita mchezo wangu wa kwanza ulikuwa kule Algeria dhidi ya JS Kabylie na pia nikacheza dhidi ya Raja Casablanca (Morrocco) uwanja ukiwa umejaa"
"Tutapambana ili kuhakikisha tunapata ushindi hapa nyumbani na tukienda Sudan pia tutapambana ili kupata matokeo yatakayotupa nafasi ya kusonga mbele," alisema
Yanga tayari imeanza maandalizi kuelekea mchezo ambapo kabla ya mchezo huo watacheza mechi ya ligi kuu dhidi ya Ruvu Shooting
