Baada ya mapumziko ya wiki mbili kupisha kalenda ya FIFA, mabingwa wa nchi Yanga leo wanarejea 'mzigoni' katika ligi kuu ya NBC
Ni pale uwanja wa Benjamin Mkapa watakuwa wageni wa maafande wa Ruvu Shooting katika mchezo unaotarajiwa kuwa na upinzani mkali
Inafahamika Oktoba 08 Wananchi wana jambo la nchi hapohapo kwa Mkapa katika mchezo wa ligi ya mabingwa dhidi ya Al Hilal ya Sudan, mchezo wa leo utatumika kama sehemu ya maandalizi kuelekea mchezo huo
Kocha Nasreddine Nabi na benchi lake la ufundi walifanyia kazi mapungufu yaliyojitokeza katika mchezo uliopita dhidi ya Zalan Fc, leo mashabiki wa Yanga wanaweza kushuhudia mabadiliko makubwa katika safu ya ushambuliaji
Ruvu Shooting inayonolewa na Kocha Charles Boniface Mkwasa, msimu huu wako vizuri, wameshinda mechi tatu kati ya tano walizocheza kwenye ligi
Hivyo bila shaka watawapa Wananchi kipimo kizuri kuelekea mchezo wao wa ligi ya mabingwa siku ya Jumamosi
Yanga leo inatarajiwa kuwakosa baadhi ya wachezaji; Jesus Moloko, Chrispine Ngushi, Gael Bigirimana, Khalid Aucho, Bernard Morrison na Stephane Aziz Ki hawatarajiwi kuwa sehemu ya mchezo huo kutokana na sababu mbalimbali
Hata hivyo kocha Nasreddine Nabi ana kikosi kipana, kukosekana kwa wachezaji hao haiwezi kuwa changamoto kubwa kwake
Mchezo utapigwa kuanzia saa 12:15 jioni
