Rais wa klabu ya Yanga Injinia Hersi Said amesema wamejipanga kufanya usajili mkubwa kwenye dirisha dogo la usajili kulingana na mapendekezo ya benchi la ufundi
AKizungumza katika Mkutano na Wanahabri mapema leo, Injinia Hersi amesema huu ni msimu wa kuweka alama kwenye michuano ya Kimataifa hivyo wataleta wachezaji ambao wana uwezo wa juu zaidi ya hawa waliopo
"Tumefanya kazi kwa ukaribu na benchi la ufundi na wametupa mapendekezo ya maboresho ambayo wanayahitaji kwa ajili ya kutimiza malengo yetu ambayo ni kutetea makombe yetu pamoja na kufanya vizuri kwenye michuano ya Shirikisho CAF"
"Tutafanya usajili wa mchezaji mmoja au wawili kwa kuzingatia mapendekezo hayo. Pia tunao wachezaji wawili wa kigeni Yacouba Songne na Lazarus Kambole ambao hatukuwasajili kwenye dirisha lililopita. Wamefanya juhudi kubwa na sasa wako tayari hivyo tumewaachia benchi la ufundi waamue kama watamsajili mmoja au wote wawili"
"Lakini pia kumbuka kama watawahitaji wote wawili ina maana tunahitaji kuondoa wachezaji wawili kwani tayari tuna wachezaji 12 wa kigeni. Mazingira haya yameleta ushindani miongoni mwa wachezaji kila mmoja akitaka kufanya vizuri kila anapopewa nafasi," alisema Hersi
Aidha Injinia Hersi amesema wamepokea maombi kutoka kwa klabu mbalimbali zinazowahitaji baadhi ya wachezaji kwa mkopo
Amesema Yanga ina wachezaji wengi vijana wenye vipaji hivyo wapo baadhi ya wachezaji watawatoa kwa mkopo ili wakapate nafasi zaidi ya kucheza ili kuendelea kuwaimarisha
