Baada ya mlinda lango wa Azam Fc Ali Ahamada kutema shuti la Stephane Aziz Ki hapo jana Farid Mussa kuifungia Yanga bao la ushindi katika mchezo wa ligi kuu uliopigwa uwanja Mkapa, kwa mara nyingine lawama amepewa Ahamada
Katika mchezo huo ambao Yanga iliibuka na ushindi wa mabao 3-2, Aziz Ki alikuwa mwiba kwa Azam Fc akifunga bao moja na kusababisha mabao mengine mawili likiwemo la mpira wa adhabu ambao Ahamada alitema kabla ya Farid kumalizia
Wale wanaomlaumu Ahamada walipaswa kufuatilia mechi zilizopita na wangebaini kumbe Ahamada sio kipa wa kwanza kukutana na mashuti ya moto ya Aziz Ki
Walinda lango wa timu za Mtibwa Sugar, Club Africain, Simba, Namungo Fc, Coastal Union wote wanafahamu ugumu wa kudaka mikwaju ya Aziz Ki
Kuna utani winga Denis Nkane ameandika kwenye ukurasa wake wa mtandao wa kijamii akidai kuwa hata huko kambini Avic Town wakiwa kwenye viwanja vya mazoezi shughuli za Aziz Ki huwa sio ndogo
Nkane akadai kesi zimekuwa nyingi kutoka sokoni huko Kimbiji kwani mashuti ya Aziz huwa yanakwenda kuangukia sokoni na kuharibu bidhaa za wafanyabiashara...!
Wanaolaumu magolikipa wanapaswa kuheshimu uwezo wa Aziz Ki na kukubali kuwa ni mahiri katika mipira hiyo iliyokufa
Unaweza kudhani hatumii nguvu anapopiga mashuti yake lakini usijidanganye! Ni fundi hasa wa kupiga mipira hiyo na miguu yake ina nguvu za ajabu!
