Baada ya mapumziko ya siku kadhaa, kikosi cha Yanga kinatarajiwa kurejea mazoezini Alhamisi, Januari 12 2023 kuanza maandalizi ya mchezo wa ligi kuu dhidi ya Ihefu Fc
Mchezo huo utapigwa Jumatatu, Januari 16 katika uwanja wa Benjamin Mkapa
Taarifa iliyotolewa na Yanga, imebainisha kuwa, wachezaji wote ambao hawakushiriki michuano ya kombe la Mapinduzi wataingia kambini Januari 12 wakati wale waliokuwa Zanzibar wataingia kambini Januari 13
Yanga imepania kuendeleza pale ilipoishia 2022 ili kuhakikisha inatetea ubingwa wa ligi kuu kwa msimu wa pili mfululizo
Wananchi wanahitaji kushinda mechi tisa katika 11 zilizobaki ili kuwa kwenye nafasi nzuri ya kutwaa ubingwa
Mchezo dhidi ya Ihefu Fc utakuwa wa kisasi, kwani Wananchi wanakumbuka walipoteza kwa kufungwa mabao 2-1 katika mchezo wa duru ya kwanza uliopigwa Mbarali
