Ni wazi Kocha Mkuu wa Yanga Nasreddine Nabi na benchi la ufundi wamefanyia kazi changamoto zilizojitokeza kwenye mchezo dhidi ya US Monastir ambao Wananchi walipoteza kwa kufungwa mabao 2-0
Katika mchezo huo, Yanga ilitawala kwa muda mwingi lakini waliadhibiwa kupitia mipira ya kutenga ambayo Monastir waliitumia kufunga mabao yao
Baada ya kutua kutoka Tunisia, Nabi alieleza masikitiko yake kwa vijana wake kuruhusu mabao hayo aliyoyaita mepesi
Nabi akaahidi watafanya kazi ya maboresho kwenye viwanja vya mazoezi ili kuhakikisha hawarudii makosa hayo katika mchezo unaofuata dhidi ya TP Mazembe na mechi zitakazofuata
TP Mazembe nao ni wazuri katika mipira ya kutenga hivyo ni lazima safu ya ulinzi ya Yanga kujiandaa kukabiliana nao
Kuhusu changamoto ya kutengeneza na kutumia nafasi iliyoonekana katika mchezo uliopita, kocha Msaidizi wa Yanga Cedric Kaze alisema mashabiki wa Yanga watarajie mabadiliko katika mchezo dhidi ya TP Mazembe
"Hii ni mechi muhimu sana kwetu. Hatukufarahishwa na matokeo ya mchezo uliopita, hii ni nafasi kwetu kutumia vyema uwanja wa nyumbani kupata ushindi. Wachezaji wametumika vyema mazoezini kurekebisha mapungufu yaliyojitokeza katika mchezo uliopita"
"Ari na morali ya timu iko juu sana, nafikiri kila mmoja yuko tayari kwa mchezo huu muhimu kwetu," alisema Kaze
